Text[]
Bestiaire Divin[]
French original[]
Or vos diron de l'unicorne:
Beste est qui n'a fors une corne,
Enz el meleu de front posee.
Iceste beste est si osee,
Si conbatant et si hardie,
A l'olifant porte envaie,
La plus egre beste del mont,
De totes celes qui i sont.
Tant a le pie dur et trenchant,
Bien se conbat o l'olifant,
Et l'ongle del pie si agu,
Que riens n'en peut estre feru,
Qu'ele nel perce ou qu'ele nel fende.
N'a pas poor que se deffende
L'olifant, quant ele requiert;
Quer desoz le ventre le fiert,
Del pie trenchant cum alemele,
Si forment, que tot l'esboele.
Ceste beste est de tel vigor
Qu'ele ne crient nul veneor.
Cil qui la veulent essaier
Prendre par engin, et lier,
Quant ele est en deduit alee,
Ou en monteigne, ou en valee,
Quant il ont trove son convers
Et tres bien assigne son mers,
Si vont por une dameiselle,
Qu'il sevent qui seit pucelle;
Puis la font seier et atendre
Au recet, por la beste prendre.
Quant l'unicorne est venue,
Et a la pucelle veue,
Dreit a le vient demaintenant,
Si se chouche en son devant;
Adonc sallent cil qui l'espient;
Ileques la prennent et lient,
Puis la meinent devant le rei,
Trestot a force ou a desrei.
Iceste mervellose beste,
Qui une corne a en la teste,
Senefie nostre Seignor
Jhesu-Crist, nostre Sauveor.
C'est l'unicorne esperitel,
Qui en la Virge prist ostel,
Qui est tant de grant dignite;
En ceste prist humanite,
Par quei au munde s'aparut;
Son pueple mie nel quenut.
Des Jeves einceis l'espierent,
Tant qu'il le pristrent et lierent;
Devant Pilatre le menerent,
Et ilec a mort le dampnerent.
Icele beste veirement
N'a qu'une corne seulement,
Senefie sollenpnite,
Si cum Dex dist por verite,
En l'Evangile aperte et clere:
"Nos sommes un deu et un pere."
Et le boen prestre Zacarie,
Einz que Dex nasquist de Marie,
Dist que en la meson Davi,
Son boen effant, son boen norri,
Drecereit damledeu son cors.
Et Dex dist meismes uncors,
Par Davi, qui si crie et corne:
"Si cum li corn de l'unicorne,
Sera le mien cors essaucie".
Si cum Dex l'out covenancie,
Fu cele parole aemplie,
Si comme dist la prophecie,
Quant Jhesu-Crist fut corone
Et en la neire croiz pene.
La grant egrece senefie,
Donc ceste beste est aemplie,
Ce qu'onques ne porent saveir
Les pootes de ciel, por veir,
Trone, ne dominacion,
L'ore de l'incarnacion:
Onques n'en sout veie ne sente
Le deable, qui grant entente
Mist a saveir, moult soutilla,
Onc ne sout comment ce ala.
Moult fist Dex grant humilite
Quant por nos prist humanite;
Issi com il meismes dit,
Et en l'Evangile est escrit:
"De mei, ce dist Dex, apernez,
Que entre vos ici veez,
Comme je sui simplex et douz,
Humble de cuer, non pas estouz."
Sol por la volente del pere
Passa Dex par la Virge mere,
Et la parole fu char fete,
Que virginite n'i out frete;
Et habita o nos meismes
Si que sa grant gloire veimes,
Comme verai Dex engendre,
Plein de grace et de verite.